CEBU CITY — Mipahimangno si Cebu Governor Gwendolyn Garcia nga ipatigbabaw gayud ang mga quarantine protocols alang sa mga overseas Filipinos nga mamalik sa Sugbo.
Kini human nga nakadawat og report si Garcia gikan sa mga mayor kalabot na sa giingong pagkalusot sa tulo ka mga OFWs nga walay igong dokumento sa kwarantina.
Giila ang mga OFWs nga silang Arnie Osabel (nga taga-Tudela, Camotes), Alexander Bascon (nga taga-Talisay City), ug Junard Rusiana (nga taga-Samboan.
Matud ni Garcia nga igo lang nga gipresentar sa tulo ang certification gikan sa barangay ug memorandum gikan ni Office of the Civil Defense (OCD)-5 Claudio Ycot aron lang makasulod sa Sugbo.
Gihimug-atan ni Garcia nga dili basta-bastang makasulod ang mga repatriates ubos sa guidelines gikan sa IATF.
Mipahinumdom ang gobernadora nga kinahanglang maka-present og certificate of quarantine gikan sa DOH o sa local health officer, travel pass gikan sa Bureau of Quarantine, ug certificate of acceptance gikan sa local chief executive sa point of entry.
Mihangyo usab si Garcia sa PNP, coast guard, ug sa Cebu Port Authority nga tabangan ang local officials alang sa mga gustong mobalik sa Sugbo.
