PROVINCE OF CEBU- Gitawag ni Cebu Governor Pamela Baricuatro nga “kataw-anan” ang sugyot ni Cebu Fifth District Representative Vincent Franco “Duke” Frasco nga magtukod og ikaduhang international airport sa lungsod sa Sogod, amihanang bahin sa Sugbo.
Sumala sa gobernador, dili kini praktikal nga plano tungod kay hangtod karon, wala pa gani mahuman ang ubang proyekto sa probinsiya.
Kini sama sa Camotes Airport, nga iyang gihimong basihanan sa iyang pagduhaduha sa feasibility sa maong panukiduki.
Apan si Cong. Frasco mipasabot nga ang iyang sugyot adunay long-term purpose, aron mapaabot ang disaster preparedness ug mapalapdan ang infrastructure capacity sa Sugbo.
Matod niya, ang bag-ong linog nga miigo sa rehiyon nagpamatuod nga peligroso kung usa ra ka airport ang saligan, sama sa Mactan-Cebu International Airport (MCIA).
Gdugang niini, nga ang ikaduhang tugpahanan, makatabang sa mas paspas nga paglihok sa mga tawo, kargamento, ug relief operations panahon sa emerhensya.
Iyang gitumbok ang lungsod sa Sogod nga usa ka estratehikong lokasyon, kapin 50 kilometros gikan sa Cebu City, nga accessible pinaagi sa Marcelo Fernan Bridge ug duol sa Cebu International Container Port sa Consolacion.
Gisugdan na ni Frasco ang koordinasyon sa Department of Transportation (DOTr) alang sa feasibility study, ug plano niyang i-reintroduce ang proposal sa sunod nga sesyon sa Kongreso.
