Magpadayon gihapon ang Cebu City Police Office (CCPO) sa ilang mga operasyon batok sa ginadiling drugas subay na sa kasaulugan sa fiesta ni Senyor Santo Niño.
Matud ni CCPO OIC Director Police Colonel Engelbert Soriano nga dili sila mohunong sa mga anti-drug operations bisan pa man sa gipatuman nilang hugot nga seguridad sa fiesta.
Dugang pa niini nga aduna silay gihan-ay nga operasyon karong Sinulog aron malikayan ang pagkuyanap sa ilegal nga drugas, partikular na ang mga party drugs.
Ipatuman sa gihapon ang liquor ban ug pagdili sa mga street parties sulod sa 100-meter radius sa Sinulog procession ug festival route.
Mipahimangno usab si Soriano sa mga mag-party atol sa kapyestahan nga magbantay gihapon ang kapulisan aron pangdakpon ang mga magpabadlong.
