Gisaway ni kanhi presidential spokesperson Atty. Harry Roque ang mga sakop sa House of Representatives nga misuporta kaniadto kang Bise Presidente Sara Duterte apan padayon usab nga misuporta sa impeachment complaint batok sa bise presidente.
Sa usa ka pahayag human sa pag-impeach kang VP Sara sa Kamara, ang abogado nitumbok sa pipila ka mga magbabalaod nga iyang giingon nga kanhi mga higala ug mga tigpaluyo kaniadto ni Duterte.
Usa sa gitumbok ni Roque mao ang mga representante sa Cebu nga nisuporta sa impeachment gawas lang sa duha.
Gipasabot sa kanhi tigpamaba ni kanhi Presidente Rodrigo Roa Duterte, ang pamilyang Duterte gikan kaniadto sa Sugbo apan nibalhin lang sila sa Mindanao, pipila na ka dekada ang nakalabay.
Gitawag usab ni Roque ang pipila ka mga magbabalaod nga giingong ‘sipsip’ kang VP Sara apan misuporta usab sa iyang impeachment.
Base sa kopya sa mga pirma sa mga magbabalaod nga misuporta sa impeachment, lakip sa mga representante sa Sugbo nga misuporta mao sila si 2nd District Rep. Eduardo Rama, 7th District Rep. Peter John Calderon, 4th District Rep. Janice Salimbangon, 1st District Rep. Rhea Gullas, 5th District Rep. Duke Frasco, ug 6th District Rep. Daphne Lagon.
‘Alam mo pinaka nalulungkot ako diyan ay yung mga taga Cebu, kase yung mga Duterte naman taga Cebu ‘yan eh -eh lahat sila pumirma execpt sa dalawa lang na kongresista yung isa do’n naalala ko kapatid pa ni Governor Gwen si Pablo John Garcia hindi pumirma pero yung dati talaga super sipsip kay VP Sara,’ gidugang niini.
Matod ni Roque, wala siya kasabot nganong daghan gihapon sa mga ‘loyalist’ o supporters ni VP Sara ang nipirma sa impeachment, nga nahuman na ang deliberasyon sa maong pundo ug aduna nay pundo nga gigahin sa ilang tagsa-tagsa ka distrito.
Gitataw ni Roque nga daghang mga magbabalaod ang nabalaka nga dili sila mahatagan og pundo kon dili sila mosuporta sa impeachment.
