CEBU CITY-Hugot nga gipasalig sa mga kadete sa Philippine National Police Academy (PNPA) nga hingpit nang bungkagon ang hazing tradition sulod sa akademya.
Kini nunot sa mga nilabay nga mga insidente kabahin sa hazing ngadto sa mga bag-ong recruit nga underclassmen sa PNP nga nakamugna og stigma ngadto sa publiko mahitungod sa mga kapintasan sulod sa akademya.
Samtang gitino sa mga PNP cadets atol sa ilahang pagbisita sa Police Regional Office sa Central Visayas (PRO-7) nga wala nay hazing activities nga gipahigayon sulod sa ilahang akademya, gani wala na silay hazing issue nga nadawat o nadunggan sukad-masukad.
Matod usab ni Cadet First Class Rey Alfred Daño nga hugot ang pag-implementar sa Republic Act 11053 or Anti-Hazing Act of 2018 sulod sa lawak sa ilahang tunghaan.
Dugang sa kadete, nga nangamuyo sila sa pinakataas nga porma sa pagdisiplina, ingon man sa mga lagda ug regulasyon, diin lakip na ang pagbawal sa hazing.
Kahinumduman nga niadtong tuig 2021, adunay usa ka kadete sa PNPA nga gipasakaan og kasong criminal nga mao ang Republic Act 11053 o ang Anti-Hazing Lawtungod sa pagkalimbigit niini sa pagkamatay usa ka 3rd class cadet nga si George Karl Magsayo kinsang namatay gumikan sa pagbalik-balik og sumbag kaniya sa suspek sulod mismo sa lawaK sa PNPA.
Sa laing bahin, Republic Act 11053 o gitawag nga Anti-Hazing Law nga nag-prohibit sa unsang klase sa hazing sa mga fraternities, sororities, ingon man sa mga organisasyon sa mga tunghaan, lakip na ang mga citizens’ army ug military trainings.
