Gikumpirmar ni Senate Blue Ribbon Committee Chairperson Panfilo “Ping” Lacson nga ipadayon sa Enero 19 ang hearing sa Senado bahin sa giingong mga anomaliya sa flood control projects.
Sumala ni Lacson, magsugod kini sa ala 1 sa hapon, diin ang hearing maghisgot sa giingong pagbakwi sa kanhing mga opisyal sa Department of Public Works and Highways (DPWH)-Bulacan nga sila si Brice Hernandez ug Henry Alcantara gikan sa ilang mga pahayag ngadto sa Senado.
Dugang pa sa senador nga bisan pa man og ang Department of Justice (DOJ) miingon nga wala pa’y pormal nga pagbawi ni Alcantara ang iyang mga gibutyag sa giingong mga anomaliya sa mga proyekto sa imprastraktura sa gobyerno atol sa hearing sa Senado nga gihimo niadtong Setyembre 2025, aduna gihapoy mga diskusyon kung unsa ang posibleng mga silot kung ang maong kanhing mga opisyal sa DPWH mobawi sa ilang mga sinumpaang pahayag ngadto sa blue ribbon committee.
Gipasiugda usab niini nga giklaro sa Senado sa DOJ kung ang kanhing mga opisyal sa DPWH nagsumiter ba sa ilang mga counter affidavit sa ilang mga pahayag. Diin, gipasalig ni Lacson nga ang silot madugangan kung mapamatud-an ang pagbawi.
Samtang, gipasabot ni Lacson nga bisan kung si Alcantra ug Hernandez moatras sa pagka-saksi, ang nagpadayon nga imbestigasyon mahimo gihapon nga magpadayon tungod kay adunay ubang ebidensya nga mahimong magtudlo sa mga nalambigit sa mga proyekto sa pagkontrol sa baha sama sa money trail o paglihok sa kwarta nga gilakip, may kalabutan o konektado sa testimonya sa kanhing mga opisyal sa DPWH nga mahimong ikonsiderar sa DOJ o Ombudsman alang sa imbestigasyon.
Niining bahina, ipatawag sa blue ribbon committee ang kanhi undersecretary sa Department of Education (DepEd) nga si Trygve Olaivar, kanhi kalihim sa DPWH nga si Manuel Bonoan ug uban pang mga resource person nga wala motambong sa unang mga hearing ug mo-isyu og mga subpoena niadtong dili motambong pag-usab.////
Samtang, gikonsiderar usab niini kung imbitahon ba si Batangas 1st District Representative Leandro Leviste sa hearing kalabot sa iyang pagbutyag sa giingon nga “Cabral files”.
