PROVINCE OF CEBU- Mipasabot ang kapulisan sa Dumanjug Municipal Police Station kabahin sa dagan sa ilahang imbestigasyon subay sa kamatayon sa usa 83-anyos nga Lola, nga nakit-ang nabuwag ang ulo sa lawas sa Brgy Candabong, lungsod sa Dumanjug sa habagatang – kasadpang Sugbo niadtong Sabado, Pebrero 1, 2025.
Sa pakighinabi sa Bombo Newsteam ni Police Captain Eden Rex Baguio, ang hepe sa Dumanjug Municipal Police Station, gitino niini nga sa pagkakaron wala sila’y nakitang ‘foul play’ sa kamatayon niini.
Kini subay sa imbestigasyon sa Kapulisan og Scene of the Crime Operatives (SOCO), nga wala silay nakitang pagpanglungkab og bisag unsang timailhan nga adunay pagsulod sa panimalay sa maong biktima.
Dugang pa, wala usab silay nakitang motibo sa pagpanulis kana gumikan kay naka-intact pa ang kwarta nga anaa ras kilid sa biktima ingon man ang alahas nga kwentas sa maong tigulang.
Gitataw ni Police Captain Baguio nga ang posibling unang angulo og nganong nabuwag ang lawas og ang ulo niini kay nadugta na ang lawas sa dihang nakit-an sa iyahang mga kabanay.
Sa pagkonsiderar nga ang iyang lawas nagsugod na sa pagkadunot, siya miingon nga possibling ang mga binuhi nga iro nagka-interes niini og nagsugod sa pagpaak sa iyang liog, hinungdan sa pagkabulag sa iyang ulo.
Gidugang sa opisyal, nga gilubong na sa kabanay ang patay nga lawas sa biktima, tungod kay nabaho og nalata na ang lawas ingon man nga anaa na sa ‘state of decomposition’.
Giklaro usab ni Baguio nga misubay sila sa saktong procedure sa pag-imbestigar sa maong kaso og gi-examine tanang area kung asa namatay ang maong biktima inubanan usab sa mga sakop sa SOCO, sukwahi sa mga nikatap online nga wala nila gitarong sa pagsusi ang kamatayon sa ‘senior citizen’.
Hinungdan, nanawagan kini sa publiko nga likayan ang espekulasyon ug sayop nga impormasyon, ingun man nga magmabinantayon sa pagpaambit sa impormasyon, kay makapahinabo kinig wala kinahanglana nga kalisang.
Gitino sa opisyal, nga wala sila nagkulang sa ilahang pag-imbestigar og abli ang ilahang buhatan sa pagtan-aw sa mga posibling motibo og mga hinungdan sa kamatayon sa tigulang.
Una niini, ang biktima nga si Miguela Pocong Barino, 83-anyos nga nag puyo usab sa susamang dapit nakit-an nga patay og nabuwag ang iyang ulo sa hagdanan sa iyang panimalay.
Nahinabi na usab sa Bombo News team ang kabanay sa Biktima, dinhi ilahang gitataw, nga usa sa ilahang gipanglantawan nga hinungdan sa kamatayon niini mao ang ‘heart attack’ nga wala dayon nila nabantayan kana gumikan kay nag-inusara ra kining nagpuyo sa iyang panimalay niadtong higayuna.
