CEBU CITY-Gitinguha karon sa Labangon police station 10 nga mapaubos sa forensic examination ang cellular phone ni Rhea Mae Tocmo, ang 19 anyos nga dalaga nga gituok patay ni Simeon Gabutero niadtong Hulyo 16, 2023 didto sa Banawa Barangay Guadalupe.
Matod ni Police Major Angelito Valleser, ang hepe sa Labangon police station nga ilang giawhag ang kabanay ni Tocmo nga mopirma og pagtugot nga mapaubos sa Forensic Examination sa PNP Forensic Unit 7 ug sa PNP Cybercrime Unit ang cellular phone sa biktima nga gibaligya ni Gabutero sa usa ka tindahan sa dalan Colon.
Dugang ni Valleser nga nagsige sila og kontak sa uyoan ni Rhea Mae dinhi sa Sugbo nga hatagan silag pagtugot nga mopasusi sa cellphone sa biktima aron masayran unsay naa sa sulod niini.
Gusto ni Valleser nga inig abli sa cellphone naa ang pamilya ni Rhea Mae aron sila ang una nga makakita kon unsa man ang naa sa sulod.
Dako og pagtuo ang opisyal nga daghan ang makuha nga impormasyon ilabina sa mga lakaw ni Rhea Mae sa wala pa kini gipatay ni Simeon Gabutero.
Dugang pa sa opisyal nga aduna na silay inisyal nga kasayuran nga nakuha labot sa pamahayag ni Gabutero sa giingong iyang na diskobrehan sa cellphone sa biktima apan wala lang nila kini gibulgar isip pagrespeto sa pamilya niini.
Sa pikas bahin, padayun nga gibarugan ni Police Lieutenant Colonel Janette Rafter, ang deputy director for operations sa Cebu City Police Office (CCPO), nga lig-on ang ebidensiya sa kapolisan batok kang Gabutero.
Apan, bisan paman niina ilaha gihapon nga gi-awhag ang pamilya sa biktima nga mosumiter og ebidensiya sa Labangon Police Station 10, nga maoy nagdumala sa kaso, aron pagpalig-on sa pangangkon nga laing tawo ang responsable sa krimen, subay usab sa pagtumaw sa giilang si alyas ‘Bianca’ nga nakumugna ug kasamok ug kalibug sa katawhan ingun man sa pamilya ni Rhea Mae.
Gihimug-atan sa Opisyal nga kung walay salig ang giilang si alyas ‘Bianca’ sa kapulisan,mamahimo kini nga mo-adto sa ubang ahensya sa gobyerno sama sa National Bureau of Investigation aron ipresentar ang iyang CCTV clip sa usa ka babaye nga giingong nalambigit sa kamatayon ni Tocmo.
