Misamot pa ang pagbinayloay sa mga pag-atake tali sa militanteng Hezbollah ug Israel.
Human sa sunod-sunod nga mga pagbuto sa Lebanon nga nagbilin og 37 ka patay ug liboan ang samdan, ang militanteng grupong Hezbollah naglunsad usab og 17 ka pag-atake sulod lang sa usa ka adlaw batok sa mga sundalo sa Israel, mga sakyanang militar ug mga pinuy-anan sa amihanang Israel.
Kini ang pinakadako nga operasyon sa grupo sukad niadtong Hunyo.
Gitarget sa ilang rocket salvos ang mga base militar sa Israel sa Liman, Adamit, Shomera, Matat ug ang headquarters sa 810th Hermon Brigade sa barracks sa Ma’ale Golani.
Gipunting usab sa militanteng grupo ang mga posisyon sa artilerya sa militar sa Israel sa Beit Hillel gamit ang mga drone, nga gitarget ang lokasyon sa mga opisyal ug sundalo ug naigo usab ang bag-ong natukod nga command post alang sa Western Brigade sa settlement sa Yara ug uban pang mga lugar sa militar sa Israel.
Samtang sa habig sa Israel, gikataho nga ang mga pwersa niini naigo sa gatusan ka mga target sa sulod sa Lebanon, pipila ka oras pagkahuman ang lider sa Hezbollah misaad nga manimalos sa mga pagbuto sa ilang mga pager ug walkie talkie nga nakapatay sa ilang mga miyembro.
Pipila ka oras pagkahuman sa hulga sa lider sa Hezbollah, ang mga jet militar sa Israel nakaigo sa gibanabana nga 100 nga mga launcher ug dugang nga mga site sa imprastraktura sa terorista.
