CEBU CITY– Nakadawat og dakong pagdayeg ang mga kapulisan sa Tagbilaran Police Station gikan PRO-7 Director, Police Brigadier Redrico Maranan, kabahin sa ilang malampuson nga pagsikop sa usa ka high-profile nga drug suspek niadtong Biyernes, Abril 4, 2025.
Nahitabo kini nga operasyon atol sa gihimong buy-bust transaction, mga alas 3:18 sa hapon sa Purok 4, Barangay Taloto, Tagbilaran City, nga miresulta sa pagkasikop sa usa ka 31-anyos nga usa ka kusinero sa restawran.
Sumala sa report sa Police Regional Office -7, nasakmit ang 1.6 kilos nga shabu nga adunay gibana-bana nga kantidad nga PhP10,880,000, sa Tagbilaran City, Bohol.
Kasamtangang gitanggong sa Tagbilaran City Police Station ang dinakpan samtang nagpadayon ang pagpangandam sa tukmang kaso alang sa suspek.
Gibutyag ni Police Brigadier Maranan, kini nagpakita nga namintinar ang tagsa-tagsa nga katungdanan pamaagi sa nagpadayon nga kampanya batok sa ilegal nga drugas, nga nagpasiugda sa malampuson nga mga resulta sa natad sa pagsakmit ug pagdakop. (BOMBO Irene Ardiente)
