CEBU CITY — Gihimakak ni Brgy. Mambaling Kapitan Gines Abellana ang giingong daghan pa sa mga molupyo sa pipila ka Sitio sa barangay nga wa makadawat sa ayuda gikan sa Cebu City government nga gi-agi sa barangay.
Matod ni Kapitan Abellana nga di tinu-od ang gibutyag ni Brgy. Councilor Anne Marie Palomo nga daghan ang wa pa kadawat sa bugas og mga delata.
Sigon kang Abellana nga ila nang na-apod-apod ang mga sinakong bugas nga gihatod sa City government nga anaa sa 800 ka sako alang sa unang hugna sa tabang.
Hinu-on gi-angkon ni Abellana nga adunay mga pamilya nga nagbahin-bahin sa usa ka sako human nga gitunga na lang ang bugas aron maka-igo sa mga nanginahanglan samtang giplastar matod pa ang mo-abot nga dugang bugas.
Samtang ginganlan niini nga “kulang sa pansin” ang konsehala nga si Palomo sanglit puro lang matod pa kini pamulitika.
Gihangyo matod pa niini ang konsehala nga magtinabangay na lang ilabi na ning panahon nga adunay gi-atubang nga COVID-19 crisis.
Mipadayag si Mambaling Brgy. Councilor Anne Vestil Palomo nga giingong nagpabaya lang ang kapitan nga si Abellana sa kaugalingong mga konstituwente.
Matud ni Palomo nga mas maayong sayron sa kapitan kung unsang aspeto kini nahimong bakakon sa mga pasangil.
Gihimug-atan niini nga wala kini nagpatagad inay gidala niini ang tingog sa katawhan nunot na sa panahon sa krisis.
Gitumbok ni Palomo nga dili dinalian ang nahimong distribusyon sa hinabang nga pagkaon ngadto sa mga apektado sa lockdown ug gigutom na ang mga tawo.
Gibarugan ni Palomo nga labing mahinungdanon ang “sense of urgency” ning panahon sa pandemic ilabi na nga gatusan na ang natakdan sa COVID-19.
Anaa na sa kapin 600 ang ihap sa mga natakdan sa COVID-19 sa Brgy. Mambaling.
