Pormal na nga gisugdan sa House of Representatives ang pagrepaso sa gisugyot nga ₱7.2-trilyon nga 2027 National Expenditure Program (NEP) pinaagi sa briefing sa Development Budget Coordination Committee (DBCC) karong Lunes, Agosto 17, 2026.
Ang maong briefing nagtimaan sa pagsugod sa deliberasyon sa badyet sa Kongreso, diin tukion sa mga magbabalaod ang mga gisugyot nga alokasyon sa nagkalain-laing ahensya sa gobyerno.
Apil sa ilang pagrepaso ang paggamit sa pondo, prayoridad sa matag ahensya, ug ang gilauman nga epekto sa mga programa ug proyekto ngadto sa mga Pilipino.
Mitambong sa briefing si House Speaker Faustino “Bojie” Dy III, uban sila House Committee on Appropriations Chairperson Rep. Mikaela Angela Suansing, Senior Deputy Speaker Ferdinand Hernandez, Majority Leader Ferdinand Alexander “Sandro” Marcos, ug uban pang mga lider sa House.
Gilauman nga mahimong sentro sa deliberasyon ang mga programa ug proyekto nga adunay direktang epekto sa panginahanglan sa publiko, lakip ang mga serbisyo sa gobyerno, imprastraktura, edukasyon, panglawas, ug uban pang prayoridad sa administrasyon.
Sa NEP turnover niadtong miaging semana, gipasiugda ni Speaker Dy nga dili lamang ang gidak-on sa pondo ang tutokan sa House sa pagrepaso sa mga proposal sa mga ahensya.
Matod niya, susihon usab sa mga magbabalaod kung unsaon pagpatuman sa mga programa, unsay gilauman nga resulta, ug kung unsa ka-epektibo ang paggamit sa pondo alang sa publiko.
Gipahayag ni Dy nga ang tumong sa proseso mao ang pagsiguro nga ang national budget mahimong mas responsive sa panginahanglan sa katawhan ug nga ang matag alokasyon adunay klarong katuyoan ug resulta.
