Nakalas ang usa ka babayeng huwes gumikan sa aksidente sa motorsiklo sa national highway sa Barangay Cabiangon, Pinamungajan, Sugbo niadtong Miyerkules sa buntag, Oktubre 22.
Giila ang biktima nga si Carmela Rosario Pasquin, 41-anyos, huwes sa Municipal Circuit Trial Court Branch 14 sa Pinamungajan-Aloguinsan. Gideklarar kini nga dead on arrival dihang gidala sa pinakaduol nga tambalanan.
Sa inisyal nga imbestigasyon sa Pinamungajan Municipal Police Station, angkas ang huwes sa usa ka ADV 150 nga gimaniho sa iyang kawani sa korte nga si Eric Lanzarate ug nabangga sa laing motorsiklo.
Gimaneho ang laing sakyanan sa 19-anyos nga si Mark James Cabiling, uban sa laing duha ka pasahero sa likod.
Nasuta nga pasado alas 6:55 sa buntag ang duha ka mga sakyanan nagsubay sa samang lane paingon sa Pinamungajan, Cebu dihang kalit nga niliko sa wala si Cabiling sa walay igong rason hinungdan nga nabangga kini sa gimaneho ni Lanzaratem hinungdan nga natumba ang duha ka motorsiklo sa kadalanan
Nakaangkon ug samad sa aksidente ang mga drayber nga sila si Lanzarate ug Cabiling, ingon man usa sa mga pasahero sa naulahi,
Samtang si Cabiling kasamtangang gitanggong sa nasangpit nga police station, samtang nagpaabot sa pagpasaka sa tukmang kaso nga reckless imprudence resulting in homicide.
