Gibuak na sa kataposan ni Ateneo head coach Tab Baldwin ang iyang kahilom pipila ka adlaw human sa trahedya, nga mikalas sa kinabuhi sa duha ka magduduwa nga sila si Rene Baterbonia ug Divine Adili sa dihang nagpahigayon og team-building ang Blue Eagles didto sa Aurora.
Giangkon ni Baldwin ang iyang kapakyasan sa pagpabilin sa pagsalig nga gihatag kaniya sa mga pamilya sa duha ka biktima pinaagi sa usa ka walo ka minutos nga video speech nga gi-post sa opisyal nga Facebook page sa Ateneo de Manila University.
Matod sa coach, nalumos ang mga magduduwa samtang nagpahigayon og routine training run sa usa ka resort sa Dipaculao, Aurora, diin giangkon niya nga napakyas siya sa pag-atiman sa kaayohan sa maong mga batan-on ug nangayo og dako nga pasaylo sa mga kabanay niini.
Gisaysay usab ni Baldwin ang maong mapait nga hitabo diin gipasabot niya nga gibuhat sa coaching staff ug sa kaubang mga magduduwa ang tanan nilang makaya aron masalbar ang duha sa dihang namatikdan nila nga napadpad na kini sa lawom ug delikado nga bahin sa dagat.
Ang maong opisyal nga pamahayag sa coach migawas taliwala sa mga panawagan sa nagkadaiyang sports groups ug mga fans nga magpakita ug motubag kini isip maong labaw nga person of authority sa nahitabong training session.
Una nang gipahayag sa unibersidad nga ila unang gipadid-an si Baldwin sa pagpagawas og pamahayag samtang wala pa makuha ang tibuok kamatuoran pinaagi sa himuong imbestigasyon sa maong tunghaan, dungan sa pagpakita sa coach sa gipahigayon nga vigil alang sa mga biktima sa main campus sa Ateneo sa Quezon City.
Gitapos ni Baldwin ang iyang mensahe pinaagi sa pag-ampo alang sa pamilya sa mga mitaliwan, pagpangayo og pasaylo sa iyang kapakyasan isip lider, ug paglaum nga makatabang ang tanan sa pagpangita og dalan padulong sa pagkaayo gikan sa maong trahedya.
