Gipasalig sa National Food Authority (NFA) nga adunay igong buffer stock sa bugas sa higayon nga adunay mahitabong katalagman sa tunga-tunga sa holiday season.
Gihimo sa NFA ang pagsiguro nunot sa natala nga mga kalihokan sa Kanlaon volcano nga nakaapekto sa mga residente duol sa bulkan ug sa gimonitor nga forecast sa intertropical convergence ug pag-ulan sa dakong bahin sa nasud.
Matod ni NFA Administrator Larry Lacson, ilang gimandoan ang ilang mga empleyado nga anaa sa field alang sa gilayon nga pagpaaktibo sa mga Operation Center sa mga lugar nga apektado sa baha, bagyo ug uban pang emerhensiya ug pag-abli sa ilang mga hotline aron mapadali ang koordinasyon sa ilang mga relief institution.
Gihingusgan usab sa ahensya ang ilang mga estratehiya sa pagpalit og bugas ubos sa Price Range Scheme aron matubag ang gikinahanglang bugas nga ipang-apod-apod sa Department of Social Welfare and Development (DSWD) ug mga lokal nga kagamhanan alang sa mga apektadong pamilya sa mga dapit nga gihampak sa kalamidad.
Gitaho usab sa NFA nga nahuman na niini ang 95% nga target alang sa buffer stocking sa bugas karong tuiga diin ang kasamtangang buffer stock niini anaa sa 5.661 milyones ka sako sa milled rice equivalent.
