Mikabat na sa 30 ang natala nga nakabsan sa kinabuhi tungod sa baha ug pagdahili sa lapok sa daghang bahin sa isla sa Sri Lanka sulod sa pipila ka adlaw nga pag-uwan.
Ingon man nga misangpot sa pagsira sa mga tunghaan ug nakabalda sa mga trabaho gumikan wala’y transportasyon.
Sa pakighinabi sa Bombo Radyo Cebu Newsteam kang Zeny Gadut, ang Bombo International Correspondent sa Sri Lanka gipaambit niini nga nihubas na ang tubig baha ug nakita na nila ang bidlisiw sa adlaw.
Basi usab sa iyang monitoring nga wala’y natala nga mga Pinoy nga nalakip sa kaswalty o naangol apan, aduna may mga nabahaan apan, luwas ra kini.
Sa pikas bahin, gikompirmar niini ang mga mitumaw nga hungihong kabahin sa mga buaya nga miduyog sa baha ingon man nga gawas sa maong mananap, gawasnon usab ang mga bitin.
Bisan paman nga gikataw-an kini ni Gadut wala nakaikyas ang iyang nabati nga kahadlok tungod sa delikado ug bisan pa nga daw normal na ang mga buaya nga maglatagaw sa mga kadalanan sa maong nasud.
