Gisumiter sa mga prosecutors sa International Criminal Court (ICC) ang ikaunom nga batch sa ebidensya sa kasong crimes against humanity batok ni kanhi Presidente Rodrigo Duterte.
Kabahin kini sa pre-trial proceedings sa kaso sa kanhi Presidente nga may kalambigitan sa giingong pagpamatay ubos sa dugoong gubat sa drugas sa iyang administrasyon.
Mokabat sa 267 ka mga butang ang gisumiter sa prosekusyon sukad nagsugod ang pagbutyag sa ebidensiya niadtong Abril 30 ug kaduha na sila nangayo og extension sa deadline sa pagsumitir sa maong mga dokumento nga giaprobahan sa ICC.
Diin ang katuyoan sa extension mao ang paghatag sa prosekusyon sa higayon nga magamit ang mga standard nga redaction sa pipila nga mga materyal aron mapanalipdan ang mga identidad sa mga saksi ug masiguro ang ilang kaluwasan.
Ingon man nga ang tanang materyales nga isumiter mahimong kabahin sa ebidensiya nga gamiton sa prosekusyon sa confirmation hearing sa kaso sa kanhi Presidente nga gikatakda karong Setyembre 23, ning tuiga.
Ang gikatakda nga pagdungog maoy magdeterminar kon aduna bay igong ebidensiya aron mapadayon ang pagdungog ug kon mapamatud-an ang mga kaso batok sa kanhi Presidente kay mag-atubang kini og full trial sa ICC.
