Lawom nga mensahe ang gipaambit atol sa ikalimang pulong sa Pito ka Katapusang mga Pulong ni Hesus sa Krus sa Siete Palabras diin, matod ni Fr. Rizalino Raypan Jr., usahay nakatutok lamang kita sa atong kaugalingon nga dili na nato maalinggatan ang kauhaw sa uban, ug labyan lang ang mga nanginahanglan.
Gibalewala ang hilom nga kasakit, ug nagtuo nga adunay lain nga moatiman niini.
Apan, giklaro ni Fr. Raypan nga siJesus, diha sa Krus, nagtudlo kanato sa paghatag ug pagtagad. “Giuhaw ako.” Gipadayag niya ang iyang kahuyang. Gitugtan niya nga siya magsalig sa uban. Ug sa pagbuhat sa ingon, giawhag kita niya sa pagtubag.
Sa susamang yugto sa pamulong, gipasigarbo usab ni Bro. Jose Ismael Icalina nga ang tawo nga nag-alagad sa Ginoo dili gayud niya pasagdan.
Diin, siya mismo ang usa sa mga nagpamatuod sa manggihatagong pag-alagad sa ubang tawo, ug kung asa siya karon, bunga kini sa mga katekista, mga kaparian, mga lider, ug mga tawo nga mitubag sa tawag sa pagpangalagad—bisan lisod.
Gitino niini nga ang iyang kinabuhi usa ka dakong ehemplo sa grasya sa Ginoo pinaagi sa halapad nga pag-alagad.
Samtang sa ika-unom nga pulong, gi-awhag ni Fr. Joseph Yntig ang tanan subay sa iyang mensahe nga kinahanglan atong angkonon nga dili tanan husto, nga adunay mga bahin sa atong kinabuhi, sa atong katilingban, ug bisan sa atong simbahan – nga manginahanglan ug pagbag-o, ug usahay modumili kita sa reporma. Mas pili-on nato ang naandan, tungod kay mahadlok kita sa kausaban.
Apan, giklaro niini nga si Jesus mihatag kanato og lain nga pamaagi, ug wala niya gipili ang kahayahay. Apan, mas gipili niini ang pagkamasinugtanon. Wala siya molikay sa kasakit. Gidawat niya ang dalan nga gihatag kaniya. Ug tungod niana, makaingon siya “Natapos na.”
