CEBU-Nagpabiling hapsay ug malinawon ang ikaduhang adlaw sa pagsang-at sa Certificate of Candidacy nga mokandidato sa 2025 midterm elections sa dakbayan sa Lapu-Lapu.
Gani, ning ikaduhang adlaw sa filing, wala’y bisan usa ang misang-at og COC karong adlawa.
Apan, bisan paman niana anaa sa kapin sa 200 ka mga kapulisan ang giandam ug gipakatap sulod ug palibot sa COMELEC office sa Lapulapu nga nahimutang sa City Hall building aron mobantay sa pagsang-at sa Certificate of Candidacy.
Matud ni Lt. Col. Christian Torres, ang tigpamaba sa Lapu-Lapu City Police Office nga adunay gipabantay nga mga pulis sulod sa City Hall building ug sa palibot ug adunay nag-standby nga sakop sa Civil Disturbance Management nga mao’y mobadlong kon adunay grupo o tawo nga magmugna og kasamok sa pagsang-at og COC sa mga kandidato.
Magpadayon ang pagpakatap sa kapin 200 ka mga pulis sa COMELEC office hangtud sa katapusang adlaw sa pagduso sa COC.
Gawas sa mga pulis nga magbantay sa COMELEC kay magpahigayon usab og random checkpoint ang lima ka Police stations sa ilang tagsa-tagsa ka hurisdiksyon aron sa pagsiguro nga malinawon ug hapsay ang siyudad.
Samtang, aduna na’y mipatim-aw nga kandidato diin modagan pagka-mayor sa dakbayan sa Mandaue sa ikaduhang adlaw sa filing sa COC.
Apan, wala’y nadawat nga Certificates of Candidacies ang Commission on Elections (Comelec) Cebu Provincial Office sa ikaduhang adlaw.
Subay niini, gipahimangnoan sa mga Cebu election officials ang mga kandidato nga mosang-at sa sayo pa sa ilang mga COC arun malikayan ang kagubot ug mga sayop kon sa last minute na moduso.
