CEBU CITY — Ipadayon sa Police Regional Office (PRO)-7 ang ilang imbestigasyon sa pagpamanhig-patay sa mayor sa Clarin, Misamis Occidental nga si David Navarro bisan pa man og dili interesado ang pamilya niini.
Matud ni PRO-7 Director Brigadier General Valeriano de Leon, nga gi-umol ang Special Investigation Task Group (SITG) Navarro aron masuta kung kinsa man ang responsable sa maong ambush incident base sa mga mahipos nilang ebidensya.
Tungod niini, gimanduan ni De Leon ang Cebu City Police Office (CCPO) nga maghimo og mga necessary validations alang sa pagpadayon sa maong imbestigasyon.
Nabantayan ni De Leon nga paspas ang nahitabong pagpamanhig sa mayor ug giplanuhan kini sa usa ka grupo.
Kahinumduman nga niadtong Oktubre 25 sa hapon sa Brgy. Guadalupe, dakbayan sa Sugbo, gibabagan sa usa ka armadong grupo ang convoy ni Navarro dayon pusil sa makadaghang higayon ngadto sa mayor.
Dugang pa ni De Leon nga magpadayon ang imbestigasyon sa maong ambush incident aron masikop ang mga responsable niini.
Samtang gi-validate usab sa PNP kung nalambigit ba ang maong mayor sa usa ka sindikato.
Una nang giklaro ni CCPO Director Colonel Gemma Vinluan nga usa lang ka isolated case ang nahitabo ni Mayor Navarro.
Gawas nga nalakip sa giingong mga narcopoliticians, nahimong kontrobersyal ang mayor sa Misamis Occidental human gipasanginlang nanumbag sa usa ka masahista sa usa ka massage parlor sa dakbayan sa Sugbo.
MALACAÑANG MIKONDENAR
Hugot nga gikondenar sa Malacañang ang pagpamanhig ni Mayor David Navarro sa dakbayan sa Sugbo.
Matud ni Presidential Spokesperson Salvador Panelo nga dili gayud himoong sayon ang pagpatay sa bisan kinsa nga inidibidwal nga sama lang sa mga kahayupan.
Nalakip si Mayor Navarro sa narcolist ni Presidente Rodrigo Duterte ug giigong nalambigit sa robbery group.
Dugang pa ni Panelo nga bisan pa man og nalakip sa narcopoliticians si Navarro o usa ka wanted nga kriminal, kinahanglan pa gyud kining moagi sa ensakto nga proseso sa balaud ug dili yanu-yanuhon lang ang pagpatay kaniya.
