Magpadayon ang impeachment trial batok kang Vice President Sara Duterte karong Lunes, Setyembre 28, bisan pa sa duha ka petisyon nga gisang-at sa Korte Suprema nga nagkuwestiyon sa bag-ong ruling sa Senate Impeachment Court bahin sa two-thirds vote threshold.
Matud ni Impeachment Court Spokesperson Atty. Reginald Tongol, sundon sa korte ang daan nang iskedyul sa pagdungog, lakip ang pagbalik sa gikatakdang saksi sa witness stand alang sa direct ug cross-examination.
Wala pa, matud ni Tongol, makadawat ang Impeachment Court og opisyal nga pahibalo o kopya sa mga petisyon, lakip ang hangyo alang sa temporary restraining order (TRO).
Tungod niini, dili pa kini makalihok base lamang sa mga report sa media.
Ang mga petisyon nagkuwestiyon sa Septiyembre 23 nga ruling sa Impeachment Court nga nag-usab sa basehan sa gikinahanglang two-thirds vote alang sa conviction.
Gipatin-aw ni Tongol nga ang pagpasaka og petition for certiorari dili awtomatikong makapahunong sa impeachment proceedings, gawas kon magpagawas ang Korte Suprema og TRO o laing direktiba nga mopahunong sa proseso.
