Giinsister ni Atty. Lorna Kapunan nga ang two-thirds vote aron makonbikto si Bise Presidente Sara Duterte sa kaso sa impeachment dili angay ibase sa 24 ka senador, apan sa gidaghanon lamang sa mga senator-judges nga aktuwal nga moapil ug maminaw sa pagdungog.
Sumala ni Kapunan, kinsa kabahin sa private prosecution panel, ang importante sa impeachment dili ang simpleng numero kondili ang presensya sa mga senador nga nakakita sa ebidensya ug nakadungog sa mga saksi.
Gipunting usab niya nga kung ang usa ka opisyal anaa sa kustodiya o gisuspinde sa katungdanan, dili siya angay iapil sa gidaghanon sa “tanan nga miyembro” diin ibase ang two-thirds vote.
Diin iyang gikutlo ang mga sitwasyon nila ni Senador Ronald “Bato” dela Rosa ug Senador Jinggoy Estrada isip mga ehemplo sa iyang argumento.
Gipasiugda usab ni Kapunan nga sa mga “kulang” sa balaod, ang espiritu sa Konstitusyon ang angay mopatigbabaw ug dili lang ang literal nga interpretasyon sa numero nga giingon sa Article XI, Section 3 sa 1987 Constitution.
Gani, gitandi niya ang maong butang sa desisyon sa Korte Suprema sa kaso ni kanhi Senador Antonio Trillanes IV, diin wala siya gitugotan sa pagbuhat sa pipila ka mga katungdanan samtang anaa sa kustodiya.
