CEBU – Gipaabot sa National Bureau of Investigation in Central Visayas (NBI-7) ang pagluwat og warrant nga magtugot kanila sa pagdakop sa usa ka inahan nga taga dakbayan sa Sugbo, kinsa gipasanginlan nga nangabuso ug nagkuha og hubo nga mga video sa iyang 4-anyos nga anak nga babaye.
Matud pa sa mga ahente sa NBI-7 nga ang inahan giingong mohikap sa iyang anak, mosulod sa iyang tudlo sa kinatawo sa bata ug mokuha og video nga iyang ibaligya sa langyaw nga mga kliyente.
Ang bata naluwas na niadtong Nobiyembre 30 ug anaa na sa kustodiya sa Central Visayas office sa Department of Social Welfare and Development (DSWD-7).
Apan wa masikop sa mga operatiba sa NBI-7 ang inahan tungod kay napakyas sila sa pagdakop niini sa akto sa pagbuhat sa giingong mga pagpangabuso.
Napakyas usab ang mga ahente sa pagpangita sa mga video sa bata sa iyang balay tungod kay nakahimo na siya sa pagtangtang niini.
Mao usab kini ang rason nga ang NBI-7 mi-apply og warrant aron pagsakmit, pagpangita ug pagsusi sa mga datos nga nakit-an o nauna nga gitipigan sa iyang telepono.
Ug samtang nagpaabot sila sa gikinahanglang warrant, gipasaka na sa NBI-7 ang mga kaso sa human trafficking ug child abuse batok sa inahan niadtong Disyembre 2 o duha ka adlaw human sa ilang operasyon niadtong Nobiyembre 30.
Sumala sa NBI-7, ang giingong pagpangabuso sa 4-anyos nga batang babaye nahitabo niadtong Hunyo hangtod Nobyembre 2022.
Gisugdan na sa mga operatiba sa NBI-7 ang pagpaubos sa inahan human nasikop sa Norwegian police ang usa ka Norwegian national niadtong Hunyo 28 tungod sa paghupot og mga materyales nga nagpamatuod sa pag-abuso sa bata.
Ang dinakpan nga Norwegian national nasuta nga nakigkontak sa inahan nga taga dakbayan sa Sugbo.
Nakit-an usab sa Norwegian police ang mga video sa iyang anak nga gihuptan sa ilang dinakpan nga national nga giingong nakuha niini gikan sa inahan nga nagbase sa dakbayan sa Sugbo.
