CEBU CITY — “Dead on the spot” ang usa ka inahan human gigulgol sa kaugalingong anak kagabii sa Alaska Mambaling, dakbayan sa Sugbo bisan pa man og gi-lockdown na.
Giila ang biktima nga si Anelita Anduque samtang nasikop ang suspek nga si Johnrey Bacsal, 25 anyos, ug parehong nagpuyo sa nahisgutang lugar.
Matud ni Police Master Sergeant Nelson Solana sa Mambaling Police Station, gibadlong sa inahan ang anak nga si Johnrey tungod kay nanglaag kini bisan og naka-lockdown ang tibuok sitio.
Hangtud nga naglalis ang duha ug miresulta sa duguong krimen kung diin gituohang gipatay ni Bacsal ang inahan gamit ang kitchen knife.
Dugang pa ni Solana nga posibleng na-depress ang suspek tungod kay wala kini nakasakay og barko aron manarbaho isip seaman.
Natanggong sa prisuhan ang dinakpan ug mag-atubang og kasong parricide.
