Gi-activate na ang Incident Command System sa Local Government Unit sa Canlaon City tungod sa pagbuto sa bulkang Kanlaon, gahapon sa gabii, Hunyo 3, 2024.
Diin ang tumong arun sa pagsiguro sa kaluwasan og kaandam sa mga komunidad.
Nipagawas og opisyal nga pamahayag si Canlaon City Mayor Jose Cardenas diin gipabakwit na ang mga residente gikan sa barangay Masulog, Malaiba, Lumapaw ug Barangay Pula.
Nunot sa pagbuto sa bulkang Kanlaon nga milungtad og 6 ka minutos ang grabe nga eruption, ingon man nga gipasaka sa PHIVOLCS og alert level 2 ang kasamtangang kahimtang sa padayong pag-alburuto sa Bulkang Kanlaon sa Isla sa Negros.
Gipahinumduman usab ni Cardenas ang mga residente nga andamon ang mga kinahanglan nga dalhon sama sa tubig, pagkaon, ug uban pa.
Sunod-sunod na usab ang pagluwat og mga EXECUTIVE ORDER SERIES OF 2024 diin nagpahibalo sa katawhan sama sa pagsira sa mga non-essential business establishments sulod sa 4 km radius sa kanlaon volcano sa canlaon city, pagsira sa mga tourism sites, pagdeklarar sa pagsuspenso sa mga trabaho sa gobyerno ug pribadong opisina karong adlawa.
Ingon man ang EXECUTIVE ORDER NO. 36 Series of 2024 diin nagpahibalo sa mandatory evacuation order alang sa mga residente nga nagpuyo sulod sa 3m gikan sa mga rivers downstream.
