CEBU CITY — Aduna gihapoy igong rason aron handumon sa nasud ang adlaw sa kaugalingnan o Independence Day karong Hunyo 12 bisan pa man sa kasamtangang hagit nga gi-atubang sa katawhang Pilipino.
Kini ang nahimong pagtataw sa manlalaban ug Cebuano historian nga si Atty. Clarence Paul Oaminal atol sa interview sa tulumanong “Good Morning Philippines.”
Matud ni Oaminal nga ang tumong kung nganong naangkon sa mga Pilipino ang kagawasan sulod sa gatusan ka tuig kay aron maprotektahan ang kaayuhan sa matag usa.
Apan nabantayan sa maong manlalaban nga ning panahon sa COVID-19 pandemic, mapakyas usab ang mga pulitiko, ingon man ang opisyal sa paghatag og serbisyo sa katawhan ning panahon sa krisis.
Hinungdan nga nitambag kini sa mga pulitiko nga kung mahimo, tahuron ang isig ka-Pilipino.
Dugang pa ni Oaminal nga ang labing sayong trabaho sa kalibutan mao ang paghatag ug pagtabang.
Hinungdan nga gihimug-atan niini nga himoong gaan sa local government units ang problemang gisagubang sa matag usa. (GN)
