METRO MANILA-Masaligon ang Bangko Sentral ng Pilipinas nga ang inflation o ang paglihok sa presyo sa mga palaliton ug serbisyo magpadayon sa pagkunhod sa sunod tuig.
Kini ang gitino ni BSP Governor Eli Remolona Jr., nga ang kasagaran nga inflation sa 2025 makita nga modula sa duha ngadto sa upat ka porsyento.
Matod niya ang “downward trajectory” magpabilin, ilabi na kay gipatuman sa gobyerno ang Executive Order Number 62, nga nagtumong sa pagpakunhod sa taripa sa importasyon sa bugas.
Gipasabot ni Remolona, nga ang ubos nga taripa dako og ikatabang sa importasyon sa bugas tungod kay dakong bahin sa natala nga inflation rate gikan sa presyo sa bugas.
Gani, giingong naapektuhan sa “supply shocks” ang presyo sa bugas ug patas ra ang kontribusyon sa inflation kon demand lang ang hisgutan.
Bisan pa, ang mga tagdumala sa ekonomiya wala magwagtang sa mga hulga sama sa taas nga presyo sa lokal nga mga pagkaon gawas sa bugas, taas nga bayad sa transportasyon ug bayranan sa kuryente.
Aron makontrol kini, ang gobyerno magpadayon sa pagpauswag sa mga inisyatibo sa suplay sa pagkaon pinaagi sa pagbag-o sa taripa, mga lakang sa pag-import ug pagpalig-on sa produktibidad sa agrikultura.
