CEBU CITY – Mipahimangno ang usa ka doktor sa publiko nga dili magpalabi ug kaon sa umaabot nga holidays.
Gipasabot ni Dr. Rene Josef Bullecer nga panahon sa Pasko ug Bag-ong Tuig daghang mga lami-an nga pagkaon ang ihanda sa talad kan-anan hinungdan nga kadaghanan sa mga Pilipino ang maghinamhinam gayud niini.
Apan mipahimangno niini si Dr. Bullecer gumikan kay giingung 22% sa mga Pilipino ang adunay sakit nga hypertension o highblood ug 10% niini ang walay tima-ilhan hinungdan nga magsalig lang ug magpatuyang sa pagkaon.
Subay niini, gibutyag ni Bullecer nga likayan ang mga ‘fatty foods’, hilabihan ka parat, ingun man nga maghinayhinay sa ilimnon nga makahubog, ug kinahanglan nga adunay insakto nga pahulay.
Giawhag niini ang tanan nga muselebrar sa ‘Yuletide season’ nga ipabilin ang himsog nga panglawas arun nga maayo ang pagsugat sa Bag-ong Tuig.
Samtang, tambag ni Dr. Bullecer sa mga adunay highblood nga tumanon gayud ang gi-prescribed nga tambal sa doktor ug wagtangon ang gituhu-an nga “tagsa ra man ni”.
