Gikumpirmar sa Israel nga magpadala og delegasyon sa Qatar karong adlawa aron isulong ang negosasyon bahin sa ceasefire sa Gaza.
Diin ang lakang nagsunod sa mga taho gikan sa Hamas nga adunay mga “positive signals” gikan sa mga mediators gikan sa Egypt ug Qatar nga nagtinguha nga sugdan ang nalangan nga ikaduhang hugna sa negosasyon sa ceasefire.
Ingon man nga walay gihatag nga mga detakye ang opisina ni Israeli Prime Minister Benjamin Netanyahu, gawas sa pagkumpirmar nga gidawat sa Israel ang imbitasyon gikan sa mga mediators nga gipaluyohan sa US.
Samtang, ang tigpamaba sa Hamas nga si Abdel-Latif al-Qanoua wala usab mohatag og dugang mga detalye bahin sa mga pakigpulong.
Magsugod na unta ang ikaduhang hugna sa negosasyon apan nalangan usa ka buwan ang milabay. Ang White House wala motubag, gawas sa kamatuoran nga ang Estados Unidos kay adunay direkta nga mga pakigpulong sa Hamas.
Sa miaging semana, gipugos sa Israel ang Hamas nga buhian ang katunga sa nahabilin nga mga hostage baylo sa pagpalawig sa una nga hugna sa ceasefire, nga natapos sa katapusan sa semana, ug usa ka pasalig nga makigsabot sa usa ka dugay nga kasabutan sa ceasefire.
Sumala sa mga awtoridad sa Israel, ang Hamas naghupot sa 24 ka buhi nga mga hostage ug mga lawas sa 34 pa.
Ang sitwasyon nakaabot sa taas nga lebel sa tensyon human giputol sa Israel ang tanang mga suplay sa tabang ngadto sa Gaza, diin kapin sa 2 ka milyon nga mga tawo ang nagpuyo, sa pagsulay nga pugson ang Hamas nga makigsabot.
Gipasidan-an sa Hamas nga ang blockade makaapekto usab sa mga hostage.
Ang ceasefire temporaryo nga nagpahunong sa labing grabe nga away tali sa Israel ug Hamas, nga nagsugod sa pag-atake sa Hamas sa Israel kaniadtong Oktubre 7, 2023.
Ang unang hugna sa kasabutan nagtugot sa pagbalik sa 25 ka buhi nga mga bihag ug ang nahibilin sa walo ka uban pa, baylo sa pagpagawas sa hapit 2,000 ka mga Palestinian.
Tungod niini, ang Israel miuyon sa pag-atras balik sa buffer zones sulod sa Gaza, nga misangpot sa pagbakwit sa daghang mga Palestinian nga mibalik sa Gaza.
Samtang nagpadayon ang negosasyon, ang mga pamilya sa mga hostage sa Israel nagpundok aron mag-apelar sa U.S. Presidente Donald Trump sa pagpugong sa pag-usab sa gubat.
Nag-apelar sila nga ang pagpadayon sa away mahimong mosangpot sa “kamatayon” alang sa nahabilin nga mga hostage nga gihuptan sa Hamas.
