CEBU CITY-Anaa na karon sa kustodiya sa Cebu Police Provincial Office kon CPPO ang itom nga Toyota Fortuner nga giingong gipanag-iya ni Joel Jude Unchuan, nailhan usab nga Coach J sa Sinulog Idol nga taga Camputhaw Dakbayan sa Sugbo.
Napalgang giabandonar ang SUV duol sa carwash daplin sa highway sa Brgy. Yati, lungsod sa Liloan sa amihanang Sugbo.
Kahinumduman nga ang patay’ng lawas ni Coach J gilabay sa Palanas Barangay Inayagan Dakbayan sa Naga niadtong, Disyembre 30, 2023.
Gibutyag ni Police Major Windell Abellana, Tigpamaba sa Cebu Police Provincial Office nga gipalawman na sa kapulisan sa Naga City Cebu kauban ang Provincial Intelligence Unit ug uban pang laing estasyon sa probinsya sa sugbo ang imbestigasyon alang sa kamatayon ni Coach.
Matod pa ni Abellana, nga subjected na sa forensic examination ang maong sakyanan ug karon nagpaabot nalang sa resulta sa imbestigasyon gikan sa SOCO.
Dugang pa nga adunay CCTV footages sa maong area kung asa dapit nakit-an ang sakyanan sa biktima og gitan-aw na ni karon sa kapulisan.
Subay sa maong balita, tanan nga mga butang nga nakita o na recover sulod sa sakyanan lakip na ang sd card sa dash camera kay gikuha na sa Anti Cyber Crime Group alang sa dugang pa nga imbestigasyon.
