Gisaway ni Jasmine Curtis-Smith ug sa iyang inahan nga si Carmen Curtis ang mga bastos nga komento ni Quezon City Rep. Bong Suntay bahin kang Anne Curtis, nga iyang gihisgutan atol sa hearing sa House bahin sa impeachment case ni VP Sara Duterte.
Sumala ni Jasmine, ang insidente dili lang bahin sa usa ka celebrity, apan nagpakita sa padayon nga pagtratar sa mga babaye isip “mga butang” sa usa ka katilingban nga gidominar sa mga lalaki.
Miingon siya nga katungdanan sa mga opisyal ang pagpataas sa lebel sa diskurso ug dili pagpaubos niini.
Gisaway usab sa House Justice Committee ang maong pahayag, samtang giawhag ni Quezon City Mayor Joy Belmonte si Suntay nga mangayo og pasaylo ug molihok nga may dignidad, subay sa iyang baruganan.
Samtang, nangayo og pasaylo si Suntay human gisaway ang iyang pamahayag bahin kang Anne Curtis, apan miinsistir nga “wala siyay daotang tuyo” sa iyang analohiya.
Sumala niya, migamit lang siya og “hinimo-himo nga sitwasyon” aron ipakita kung giunsa ang mga pamahayag kanunay nga gihubad sa sayop nga konteksto.
Miingon siya nga naguol siya kung adunay nasakitan, ilabi na ang mga babaye, ug gipasiugda nga wala siyay daotang tuyo sa iyang gisulti.
Gisaway si Suntay human niya nahisgotan ang ngalan sa aktres samtang gidepensahan ang komento ni VP Sara Duterte nga “designated survivor” atol sa usa ka hearing sa Kamara.
