Gidakop sa U.S. immigration authorities si Julio Cesar Chavez Jr., ang anak sa Mexican boxing legend nga si Julio Cesar Chavez, ug gikatakdang i-deport human kini giingong misumiter og sayop nga impormasyon sa iyang aplikasyon alang sa permanent residency sa nasud.
Matod sa US Department of Homeland Security (DHS), si Chavez Jr., nasuta nga ilegal nga anaa sa Estados Unidos ug adunay relasyon sa Sinalao Cartel, nga giisip sa ahensya nga teroristang grupo.
Gipusasan kini sa iyang balay sa Studio City, Los Angeles, duha ka adlaw human siya napildi ni Jake Paul sa usa ka high-profile boxing match sa Anaheim.
Ingon man nga si Chavez Jr. adunay outstanding warrant of arrest sa Mexico tungod sa organisadong krimen ug ilegal nga armas.
Kahinumdoman nga nidaog si Chavez Jr. sa WBC middleweight division niadtong 2011, apan nalambigit kini sa daghang kontrobersiya sa tibuok niyang karera, lakip na ang pagkasuspenso sa paggamit og ilegal nga drugas.
Sa pagkakaron, naggunit siya og rekord nga 54 ka daog, 6 ka pildi, ug 1 ka tabla, lakip ang 34 ka knockouts.
