CEBU CITY- Magpahigayon ug lalom nga imbestigasyon si Cebu City Mayor Nestor Archival sa mikatap nga video online diin gi-harass sa mga sakop sa PROBE team (Prevention, Restoration, Order, Beautification, and Enhancement) ang usa ka lalaki nga tindero og tubig duol sa Cebu City Hall.
Gibutyag kini sa mayor sa pakighinabi sa Bombo Radyo Cebu News Team, nga magpahigayon siya ug mas lalom nga imbestigasyon sa maong insidente, apan iya kini susihon aron matino kung asa gayud nakalapas ang mga sakop sa PROBE.
Mibutyag si Archival nga adunay ordinansa nga nagdili sa mga manindahay sa atubangan sa City Hall, nga gilatid sa Ordinance No. 2686.
Apan giingon usab niya nga gihatagan og lugway sa kagamhanan ang mga manindahay sa tubig kay kini usa usab ka paagi sa ilang panginabuhian.
Dugan pa, nga daan na nga adunay mga nadawat nga reklamo ang kagamhanan gikan sa publiko tungod sa kasamok nga usahay makadisturbo sa uban, ilabi na sa mga opisina sa kagamhanan, mao nga pangsikopon kini sa PROBE.
Gibutyag usab sa mayor nga adunay nakadesignate nga luna alang sa mga manindahay sa tubig aron adto na modoul ang mga mamalitay, ug malikayan ang kasaba ug posibleng pagkadisturbo sa mga tawo sa simbahan ug sa Magellan’s Cross.
Sa pikas bahin, mibutyag usab si Cebu City Councilor Pastor Jun Alcover nga plano niya ipatawag ang mga indibidwal nga nalambigit sa umaabot nga regular session sa konseho, ug magpahigayon og laing imbestigasyon aron patubagon ang PROBE sa ilang pang-abuso.
Gibutyag usab niya nga plano nila nga pasakaan og kaso ang mga PROBE personnel nga nalambigit, tungod kay dili kini ang unang higayon nga nakalapas ug nangabuso sa mga tindera ug tindero.
