PROVINCE OF CEBU- Mo-donar ang kagamhanan sa Probinsya sa Sugbo, og P10 milyon nga tabang pinansyal sa Sinulog Foundation, Inc. (SFI) aron matabangan ang mga pagpangandam alang sa umaabot nga Sinulog Festival.
Matud pa ni Gov. Pamela Baricuatro nga ang mga diskusyon uban sa mga opisyal sa foundation nagpadayon lakip na sa detalyado nga pagpangandam nga mosangpot sa tinuig nga selebrasyon.
Gikumpirma niini nga nakigtagbo na siya sa mga importanteng opisyal sa SFI niadtong Martes, lakip na si Presidente Pericles “Ricky” Dakay ug Executive Director Elmer “Jojo” Labella, aron himug-atan ang suporta nga ihatag sa kagamhanan sa probinsya alang sa pista.
Gibutyag ni Baricuatro nga personal siyang moapil sa sayaw sa Sinulog, uban sa mga guest performer gikan sa Danao City atol sa mga nag-unang kasaulogan, human nga sa miaging tuig si Danao City Mayor Ramon “Nito” Durano III sa unang miingon nga ang siyudad dili moapil sa Sinulog karong tuiga.
Apan, gibawi sa dakbayan ang maong pahibalo ug gikumpirmar nga moapil kini isip usa ka guest contingent, uban ni Baricuatro nga moapil sa delegasyon.
Gihulagway sa gobernador ang iyang partisipasyon isip usa ka buhat sa debosyon o “halad,” gumikan usab kay namatikdan niini nga tradisyon na sa mga naglingkod nga gobernador ang pagpasundayag atol sa Sinulog isip usa ka paagi sa pagpasidungog sa Santo Niño ug pagpahayag sa personal nga pagtuo.
Gipaambit usab ni Baricuatro nga ang mga department head gikan sa Kapitolyo moapil kaniya atol sa pagpasundayag.
