CEBU CITY- Nagtinguha ang kagamhanang dakbayan sa Sugbo og pundo niino alang sa tuig 2025 sa kapin P17.9-bilyones.
Kini ang gipahibalo ni Cebu City Mayor Raymond Alvin Garcia kagahapong adlawa sa Lunes, Oktubre 21 diin ang maong budget lakip sa tukion sa regular session sa konseho sa dakbayan karong umaabot nga Oktubre 23, 2024.
Malaumogn nga gi-refer kini ni Mayor Garcia ngadto sa Committee on Budget and Finance nga gipangulohan ni Cebu City Councilor Noel Wenceslao.
Lakip sa mga dagko nga pundo alang sunod tuig mao ang personnel services nga nagkantidad og P2.4-bilyones; gisundan kini sa Senior Citizens Financial Assistance sa P1.1-bilyones; ikatulo ang Engineering Department sa ilang piping ug repairing nga mokabat sa P240-milyones; financial assistance for barangays sa P400-milyones, subsidy sa Sangguniang Kabataan nga P120-milyones; CHAMP program P400-milyones; garbage collection ug disposal P550-milyones; scholarship program P331-milyones; lakip na niini ang miscellaneous expenses sa free education nga P565-milyones; comprehensive climate change adaptation and mitigation projects P200-milyones; socialize housing uglot acquisition P450-milyones; establishment of Cebu City web GIS and art GIS digital P200-milyones; ug digital traffic system P250-milyones; ug sa phase 3 og construction sa new legislative building nga P100-milyones; ug DVMF P30-milyones; ug duna pay uban niini nga gigahinan og pundo sa sunod tuig.
Matud ni Mayor Garcia, duha sa iyang prayoridad mao ang panglawas ug ang housing.
Gipasabot usab sa mayor nga ang gusto niya mao kadtong realistic budget lang nga posibleng makab-ot sa dakbayan.
Malaumon ang opisyal nga aprobahan sa konseho ang maong budget proposal sa tuig 2025.
