BOHOL-Magpundo og igong mga anti-venom vaccines ang kagamhanang lalawigan sa Bohol human sa gikatahong kamatayon sa 3-anyos nga bata sa lungsod sa Loon tungod sa pinaakan sa usa ka cobra niadtong Oktubre 16.
Kini isip pagpalambo sa emergency response sa lalawigan sa maong kaso ilabi na sa hisgutanan sa panglawas.
Gibutyag kini ni Bohol Provincial Governor Erico Aris Aumentado diin ang kagamhanang lalawigan makigkonsulta ug makig-alayon sa mg eksperto gikan sa Research Institute of Tropical Medicine (RITM) sa pagpundo sa maong mga vaccines.
Matod sa gobernadora nga estratehikong ibutang ang anti-venom vaccines sa mga lungsod sama sa Tubigon, Loon, Talibon, Ubay, ug Jagna.
Dugang pa nga ang lalawigan nagkonsiderar sa pag-stock og labing menos lima ka mga vial matag tuig, bisan pa nga ang eksaktong gidaghanon magdepende sa mga rekomendasyon gikan ni Dr. Fruserma Mary Uy, ang officer-in-charge sa Bohol Provincial Health Office.
Sa pagkakaron, ang Cobra anti-venom anaa lang sa Celestino Gallares Memorial Hospital sa dakbayan sa Tagbilaran diin nahimotang ang kapitolyo.
Nagplano kini nga maghipos og anti-venom sa tanang 47 ka lungsod sa Bohol nga ilang namatikdan nga ang probinsya kulang sa igo nga mga pasilidad nga adunay tukma nga kondisyon sa pagtipig, ug gidugang nga sila nagtrabaho aron masulbad kini nga isyu.
Nunot kini sa usa ka 3-anyos nga bata sa Loon, Bohol kinsa napaakan sa kaduha nga higayon sulod sa panimalay niini nga wala nahatagan og ukmang atensyong medical hinungdan sa kamatayon niini.
Ang animal bite center sa Bohol aduna nay 15 ka animal bite centers, nga gilangkuban sa pampubliko ug pribadong health facility.
