Nagpakatap og kapin sa 2,500 ka mga security personnel ang kagamhanang probinsiya sa Sugbo ngadto sa nagkadaiyang mga tunghaan isip pagpakusog sa kaluwasan sa mga campus human sa nahitabong duguong pagpamusil sa mga tinun-an didto sa dakbayan sa Tacloban.
Ang maong lakang giaprubahan atol sa emergency meeting sa Provincial Peace and Order Council (PPOC), diin nimando si Cebu Governor Pamela Baricuatro og mga malungtarong reporma alang sa proteksyon sa kabataan, pagpangandam sa emerhensya, ug pagsumpo sa kapintasan sa mga eskwelahan.
Matod pa ni Cebu Police Provincial Office director PCol. Abubakar Udang Mangelen Jr., mokabat sa 2,516 ka mga personnel ang gipahimutang aron bantayan ang 1,567 ka mga tunghaan ug unibersidad sa Sugbo. Lakip sa mga gipang-deploy mao ang mga security guard, mga miyembro sa Barangay Peacekeeping Action Teams, ug uban pang mga designated security personnel.
Girekomenda usab sa konseho ngadto sa Department of Education ang pagpahigayon og mga kampanya ug programa alang sa mga magtutudlo, tinun-an, ug mga ginikanan mahitungod sa pagpugong sa krimen, kaluwasan sa eskwelahan, anti-bullying, gangsterism, extremism, ug radicalization. Gimandoan usab ang mga tunghaan nga ibutang sa klarong lugar ang mga emergency hotline numbers alang sa dinalian nga tabang.
Gawas niini, gipahimutang ni Baricuatro pinaagi sa Provincial Social Welfare and Development Office, Cebu Provincial Health Office, ug Provincial Youth Development Office ang usa ka province-wide anti-bullying hotline nga adunay mga itudlong focal persons.
Girekomenda usab sa PPOC nga idugang ang mga representante gikan sa Philippine National Police, Armed Forces of the Philippines, ug Bureau of Jail Management and Penology ngadto sa Cebu Provincial School Board aron mapalubos ang koordinasyon sa mga polisiya.
Una niini, gipirmahan sa gobernador ang Executive Order No. 35 nga nagtukod sa Cebu Safe Schools Program aron ma-institutionalize ang mga sumbanan sa seguridad sa campus, pagtubag sa emerhensya, pagpugong sa kapintasan, ug serbisyo sa mental health. Kini nga kamanduan gipagawas pipila ka adlaw human sa pagpamusil sa usa ka publikong tunghaan sa Tacloban City nga nikalas sa kinabuhi sa tulo ka mga tinun-an ug niasangol sa uban pa.
Ubos sa maong ehekutibong mando, kinahanglan nga ipatuman sa mga tunghaan ang standardized security protocols lakip na ang kontroladong pagsulod sa campus, sistema sa pagdumala sa mga bisita, ug regular nga drills alang sa sunog, linog, ug lockdown.
Obligado usab ang mga eskwelahan nga mopahigayon og tinuig nga safety assessments ug ayuhon ang mga namatikdang risgo, samtang motabang usab ang kagamhanang probinsiyal sa pagpalit ug pagmintinar sa mga kahimanan sa kaluwasan base sa pundo nga makuha.
