Gipasalig sa House of Representatives nga ilang tumanon ang hangyo sa Korte Suprema kalabot sa impeachment petition batok kang Bise Presidente Sara Duterte.
Matud ni House of Representatives Spokesperson Atty. Princess Abante, moduso sila og dugang gipanumpaang impormasyon kalabot sa impeachment batok sa Bise Presidente.
Nigawas ang pamahayag human nadawat sa Kamara ang kopya sa kamandoan sa Korte Suprema niadtong Hulyo 8 nga nangayo og mga dokumento kalabot sa impeachment.
Kini may kalambigitan sa petisyon nga gisang-at sa kampo ni Duterte nga naghagit sa constitutionality ug sa kasamtangang proseso sa impeachment proceedings sa Senado.
Dugang ni Abante nga ila na nga gi-refer ang maong butang ngadto sa Office of the Solicitor General nga maoy magrepresentar sa House of Representatives sa maong kaso.
Gipasalig ni Abante nga makig-alayon sila sa OSG aron masiguro nga masumitir ang mga gipangayong dokumento.
Sa gipagawas nga resolusyon sa Korte Suprema, gimando niini ang Kamara ug Senado sa pagsumite sa mga dokumento.
Gi-impeach sa House of Representatives si VP Sara sa daghang rason lakip na ang sayop nga paggamit sa P125 milyones nga confidential funds nga gigasto sulod sa 11 ka adlaw niadtong Disyembre 2022.
