Mibotar ang House of Representatives niadtong Lunes sa usa ka makasaysayanhong desisyon aron i-impeach si Bise Presidente Sara Dutert, diin kini ang ikaduhang sunod-sunod nga impeachment batok kaniya, butang nga naghatag og dakong kabalaka ug kawalay kasiguroan sa iyang tinguha nga modagan pagka-presidente sa tuig 2028.
Moabot sa 257 gikan sa 318 ka mga magbabalaod ang misuporta sa mosyon aron ipadala ang Articles of Impeachment ngadto sa Senado. Kini nga gidaghanon milabaw pa sa gikinahanglan sa Konstitusyon ug mas daghan itandi sa 240 ka mga boto sa iyang miaging impeachment sa niaging , ug 26 lamang ka mga magbabalaod ang misupak, samtang 9 ang nag-abstain.
Sa pahayag nga gipagawas human sa botasyon, ang tigpamaba sa depensa ni Duterte nga si Atty. Michael Poa niingon nga andam na ang ilang legal team nga moatubang sa husay sa Senado kon magtigom na ang mga magbabalaod isip usa ka impeachment court.
Matod niya, ang palas-anon sa pagpamatuod sa mga akusasyon anaa na karon sa mga nagreklamo subay sa balaod ug mga lagda sa ebidensya.
Dugang pa ni Poa, samtang adunay mga pangutana sa konstitusyon nga giatubang pa sa Korte Suprema, “hingpit nga andam” ang depensa sa pagpanalipod kang Duterte sa Senado.
Usa sa mga nag-unang pasangil mao ang giingong dili sakto nga pagdumala sa P612.5 milyon nga confidential funds sa OVP ug sa DepEd kaniadto. Apil usab sa mga sumbong ang mga kalainan sa iyang SALN, mga kadudahang transaksyon sa AMLC, ug ang pasangil bahin sa mga cash payout sa mga kawani sa DepEd.
Ang ikaupat nga artikulo sa impeachment nagsentro sa iyang kontrobersyal nga mga komento niadtong Nobyembre 2024, diin naghulga kini sa kinabuhi sa Presidente Ferdinand Marcos Jr., First Lady Liza Araneta-Marcos, ug kanhi Speaker Martin Romualdez.
Gidepensahan ni Rep. Gerville Luistro ang proseso ug niingon nga kini alang sa tulubagon ug kamatuoran. Ubos sa Konstitusyon, ang Senado na ang mopahigayon sa trial, ug kon makonbikto, matangtang si Duterte sa iyang pwesto ug dili na gayod makahupot og bisan unsang katungdanan sa gobyerno.
