Nadawat na sa House of Representatives (HOR) ang abiso gikan sa Senate impeachment court kabahin sa gikatakdang pre-trial conference sa impeachment case batok kang Bise Presidente Sara Duterte.
Kini ang gipahibalo ni House prosecutor ug Bicol Saro Partylist Rep. Terry Ridon.
Basi sa notice nga gipirmahan ni Acting Senate President Sherwin Gatchalian, ang kampo ni Bise Presidente Sara Duterte ug ang House prosecution panel gimandoan nga motambong sa Senate hearing sa Hunyo 18, alas 9 sa buntag.
Gimandoan usab ang duha ka habig nga mosumite sa ilang pre-trial briefs sa o sa dili pa ang Hunyo 15.
Diin kinahanglan niini nga ipresentar ang mga nauyonan nga kamatuoran, mga isyu nga sulbaron, ug usa ka lista sa mga ebidensya ug mga saksi nga ipresentar sa pagdungog.
Ingon man nga ang pre-trial conference dili abli sa media ug publiko aron mapadali ang diskusyon ug masiguro ang hapsay ug paspas nga pag-uswag sa kaso.
Sumala ni Ridon, ang pre-trial conference magsilbing giya sa iskedyul ug mga proseso nga sundon sa impeachment trial.
