Pormal nang nangayo og tabang si Cebu Governor-elect Pamela Baricuatro sa Department of the Interior and Local Government (DILG) sa pagpasayon sa hapsay nga transisyon sa gahum sa dili pa siya molingkod sa katungdanan sa umaabot Hunyo 30, 2025.
Gihangyo sa kampo ni Baricuatro, pinaagi sa pormal nga sulat nga ngadto kang DILG 7 Provincial Director Robel Sastrillo, nga makig-alayon sa iyang transition team, batok sa kampo ni Governor Gwendolyn Garcia.
Kini subay sa Memorandum Circular 2025-016, nga nagmando sa DILG provincial offices nga direktang mapadali ang transisyon ug masiguro ang pagpadayon sa serbisyo publiko.
Gihulagway niini ang resulta sa piniliay nga lig-on ug klaro nga pagpadayag sa kabubut-on sa katawhan, o panawagan alang sa kausaban ug tiunay nga pag-uswag sa Sugbo.
Matud usab sa kampo nga si Baricuatro wala magsalig sa tradisyonal nga makinarya sa politika sa panahon sa iyang kampanya.
Dugang pa, nga wala silay suporta sa kongreso, usa lang ka mayor ang nagpaluyo kaniya, ug walay mga prominenteng opisyal sa luyo niya, gawas kang kanhi presidente Rodrigo Roa Duterte.
Gihimug-atan usab niini sa kampo niini nga ang iyang tulubagon naa ra sa katawhan sa Probinsya sa Sugbo.
Gipasiugda usab niini nga ang mga sakop sa transition team ni Baricuatro gipili base sa ilang kasinatian ug kwalipikasyon, ug dili sa politikanhong relasyon.
Sapagkakaron wala pa moluwat og pamahayag ang administrasyon ni Garcia kalabot sa transisyon. | Bombo Nathaniel Sandoval
