Nagpakita og bag-ong kalihokan ang Mt. Kanlaon karong buntaga, human natala ang abo gikan sa baba sa bulkan, basi sa time-lapse footage nga nakuha sa Kanlaon Volcano Observatory – Canlaon City (KVO-CC) gamit ang IP camera niini.
Sumala sa report sa Philippine Institute of Volcanology and Seismology (PHIVOLCS), ang pagbuto nakamugna og abo ug abuhon nga aso nga miabot sa gitas-on nga 300 metros gikan sa baba sa bulkan sa wala pa kini gipalid sa hangin paingon sa habagatan-kasadpan.
Busa, nagpabiling Alert Level 2 nga taas sa bulkan, nga nagpasabot nga adunay padayon nga kasarangan nga lebel sa kagubot sa bulkan.
Gipahinumdoman sa PHIVOLCS nga ang alert level usa ka indikasyon sa posibleng phreatic eruptions o kalit nga pagbuto nga mahimong makahatag og peligro sa mga tawo sa palibot sa bulkan.
Subay niini, gitambagan sa mga awtoridad ang publiko, labi na ang mga residente sa palibot sa bulkan, nga likayan ang pagduol sa 4-kilometros nga Permanent Danger Zone (PDZ) ug sundon ang mga tambag sa lokal nga gobyerno ug PHIVOLCS.
