PROVINCE OF CEBU- Nagpadayon ang payout sa Emergency Cash Transfer (ECT) sa City Plaza sa Bogo City, diin kapin 3,878 ka mga residente ang makadawat og tabang pinansyal gikan sa Department of Social Welfare and Development (DSWD) ug sa Local Government Unit (LGU) sa Bogo, karong adlawa, Oktubre 23, 2025.
Ang mga pamilyang hingpit nga naguba ang ilang balay makadawat og ₱10,125, samtang kadtong partially damaged nga mga balay makadawat og ₱5,265.
Gipahigayon ang payout ubos sa hugot nga koordinasyon sa LGU-Bogo ug sa DSWD, nga nagtukod og duha ka entrada sa amphitheater ug gibutangan og verifier sa matag entry point aron mapadali ang proseso.
Ang mga sakop sa DSWD City Action Team aktibong nagtabang sa mga kliyente gawas sa venue aron mas mapaspas ang pagproseso ug matubag ang ilang mga pangutana.
Gisuportahan usab sa Philippine National Police (PNP) ang kalihokan aron masiguro ang kalinaw ug kahapsay, samtang gibutangan og dugang mga tolda aron mapanalipdan ang mga benepisyaryo gikan sa init ug ulan.
Ang Emergency Cash Transfer nagtinguha nga matabangan dayon ang mga pamilya nga naapektuhan sa kalamidad, isip kabahin sa humanitarian response program sa DSWD ug lokal nga panggamhanan.
