CEBU – Kapin sa 3,000 ka mga pamilya sa Bohol ang gitangtang sa listahan sa mga nakadawat sa conditional cash grants sa gobyerno nga gitunol isip kabahin sa ilang poverty reduction program.
Gibutyag ni Jiah Sayson, ang Department of Social Welfare and Development (DSWD) regional focal person sa Central Visayas, nga 3,538 ka mga tawo ang na-delist sa ilang Pantawid Pamilyang Pilipino Program (4Ps) tungod sa lain-laing rason sugod Agosto 1, 2022.
Matod ni Sayson, pipila sa mga na-delist ang namalhin nga walay pahibawo sa DSWD.
Samtang, ang uban usab wala nay mga anak ubos sa 18 anyos ug ang uban wala makatuman sa mga rekisitos nga gitakda sa ahensya.
Namatikdan ni Sayson nga ang uban gitangtang usab sa listahan tungod sa “validated” misbehavior.
Samtang, 5,742 ka mga indibidwal ang “naka-graduate” sa programa ug gikonsiderar nga self-sufficient.
Dugan ni Sayson, nga sa pagkakaron, aduna nay 60,065 ka aktibong 4Ps nga benepisyaryo sa Bohol.
Uban sa delisting ug graduation sa pipila ka mga recipients, gikatakdang mopa-ubos ang DSWD sa “massive replacement” initiative diin ilang gitarget nga ma-enrol ang 154,000 ka mga panimalay sa Central Visayas ngadto sa 4Ps program.
Wala pa hinuon matino sa DSWD kung pila ka mga panimalay gikan sa Bohol ang ma-enrol niini.
