CEBU CITY-Mokabat sa kapin 400 ka mga indibwal ang midangop sa buhatan sa Commission on Elections sa unang adlaw sa voter’s registration.
Gani, hingpit na nga andam ang COMELEC Central Visayas sa maong pagdagsa sa mga tawo ug ingon man nga lauman pa sa mga mosunod nga adlaw hangtud sa Setyembre 30 nga modoble ang maong ihap.
Hinungdan nga gipahinumduman ni Atty. Lionel Marco Castillano ang regional director sa Commission on Elections (Comelec) Central Visayas nga ang magpa-rehistro nga mag-download og application form gikan sa ilang website ug i-suwat ang mga detalye sa dili pa moadto sa ilang buhatan.
Gipahibalo usab niini nga libre na ang voters certification sa comelec, ug wala nay mabayran ang katawhan niini.
Gidugang niini, nga dili usab kalimtan sa pagdala og valid government issued Identification Card sama sa Passport, National ID, UMID ID, NBI clearance, LTO Driver’s License ID, PRC ID, Senior Citizen ID, apan walay labot ang company ID.
Alang sa mga estudyante, ang School ID o Library card madawat kini kung gani adunay pirma sa mga awtoridad sa ilang gitunghaan.
Ug sa mga naasoy nga ID, siguraduhon nga makita ang adlaw nga natawhan, kompletong pangalan, address, hulagway, ug pirma.
Sa higayon nga walay ID ug 1st time registration, mamahimo ra usab nga magdala og barangay certification nga adunay detalye nga nakabutang bahin sa imoha.
