Moabot sa 6,224 ka mga eskwelahan sa nagkalain-laing bahin sa Mindanao ang naapektuhan sa magnitude 7.8 nga linog nga miigo gahapong sa buntag, sumala sa Department of Education (DepEd).
Sumala sa ahensya, ang mga apektadong lugar naglakip sa mga rehiyon sa Zamboanga Peninsula, Northern Mindanao, Davao Region, Soccsksargen, ug Caraga.
Gawas sa mga eskwelahan, gibanabana nga 3.2 milyon nga mga estudyante ug kapin sa 128,000 ka mga magtutudlo ug uban pang mga personahe sa eskwelahan ang naapektuhan sa linog.
Tungod niini, gipahibalo ni DepEd Secretary Sonny Angara ang pagsuspenso sa mga klase sa tanang lebel sa mga apektadong lugar hangtod sa dugang nga pahibalo gikan sa departamento.
Gidugang ni Angara nga ang DepEd nagpadala na og mga structural engineer aron sa pagpahigayon og mga pagtimbang-timbang sa kadaot sa mga eskwelahan ug paghatag sa gikinahanglan nga suporta sa mga regional team.
Gitugotan usab sa departamento ang paggamit sa Maintenance and Other Operating Expenses (MOOE) sa mga eskwelahan alang sa diha-diha nga gagmay nga pag-ayo sa mga nadaot nga pasilidad nga nagkantidad hangtod sa P50,000.
Samtang, gipasalig sa DepEd nga adunay gilain nga pondo ug mga kapanguhaan sa emerhensya nga igahin alang sa mga pag-ayo ug rehabilitasyon nga magkinahanglan og mas dagkong gasto.
Gimandoan usab ni Angara ang tanang eskwelahan nga estrikto nga ipatuman ang mga lakang sa pagpangandam sa linog, lakip ang pagsunod sa mga pamaagi sa pagbakwit ug regular nga pagpahigayon og mga drill sa linog aron mapadayon ang kahandaan sa tibuok komunidad sa eskwelahan kung adunay katalagman.
