CEBU CITY-Sulod sa unang duha ka buwan sa tuig 2024, nakatala og kapin sa P39 milyon nga kantidad sa kabtangan ug lima ka mga tawo ang nakabsan sa kinabuhi sa miulbong sunog sa dakbayan sa Sugbo.
Kini subay sa datus sa Cebu City Fire Station alang sa Enero ug Pebrero sa 2024.
Gikatahong adunay kinatibuk-ang 37 ka mga insidente sa sunog nga adunay danyos nga P19,491,000 sa buwan sa Enero samtang 27 ka mga sunog ang narespondihan sa buwan sa Pebrero nga nakaguba og P19,735,750 nga kantidad sa mga kabtangan.
Kini nagpakita nga sa unang duha ka buwan sa tuig, mokabat sa P39,226,750 nga kantidad sa mga kabtangan ang nawala.
Ingon man ang 5 ka mga tawo nga namatay sa dakbayan sa Sugbo ug 16 ang naangol.
Hinungdan nga padayon ang buhatan sa Cebu City Fire Office sa ilang pahimangno sa publiko nga magbinantayon hilabi ning panahon sa huwaw.
Gawas nga magbinantayon, gi-awhag usab ang mga katawhan nga magpreserbar og tubig arun sa hilabihan nga magkinahanglan ug hingpit nga moigo ang kainit sa Sugbo, dili magnihit ug adunay igong depensa alang sa mga motumaw nga insidente.
