Gimandoan ni Gobernador Pam Baricuatro sa Cebu ang Provincial Disaster Risk Reduction and Management Office nga bantayan pag-ayo ang abo nga nakaapekto sa pipila ka bahin sa Cebu human sa pagbuto sa Kanlaon alas 7:36 sa buntag kagahapon Huwebes, ingon man ang super typhoon nga misulod sa Philippine Area of Responsibility.
Gipaubos usab ni Gov. Pamela Baricuatro ang Provincial Health Office ug ang tanan nga mga ospital sa probinsya ug distrito nga gidumala sa Kapitolyo sa heightened alert aron masiguro ang kaandam alang sa bisan unsang mga kabalaka sa panglawas o emerhensya.
Natala ang abo sa Toledo City, Aloguinsan, Pinamungajan, ug uban pang mga lugar sa Cebu, sumala sa Provincial Disaster Risk Reduction Management Office.
Matud ni Aienjeliz Dela Torre-Orong, ang tigpamaba sa Kapitolyo nga nagpadala na ang kagamhanan sa Probinsya sa Sugbo, ug mga protected face mask sa mga nagkadaiyang tambalanan ug LGUs aron ipang apud-apud sa mga lumulopyo, aron paglikay sa ashfall.
Sigon niini nga gimando usab sa kagamhanan ang pagpastandby sa mga heavy equipments nga posibleng kinahanglan sa emerhensiya, pagpaandam usab sa mga posibleng mga pasiunang mga hinabang alang sa apektadong residente.
Giklaro usab ni Orong, nga ang suspensiyon sa tanang klase, nakadepende kini sa mga Mayor nga mopatuman niini hilabi na sa mga labing apektado.
Giawhag sa kagamhanan ang mga residente, labi na kadtong naa sa mga lugar nga naapektuhan sa abo, nga magpabilin sa sulod sa balay kutob sa mahimo. Kadtong kinahanglan nga mogawas gitambagan nga magsul-ob og face mask o protective coverings aron makunhuran ang pagkaladlad sa abo sa bulkan.
Padayon nga gipahinumdoman sa Gobyerno sa Probinsya ang publiko nga magpabilin nga updated pinaagi sa mga opisyal nga tambag ug makigtambayayong sa mga lokal nga awtoridad samtang nagpadayon ang mga paningkamot sa pagmonitor ug pagtubag.
