CEBU CITY-Gibahin sa Cebu City Police Office ang ilang mga personnel nga maoy gitahasan nga mobantay sa security sa Barangay ug Sanguniang Kabataan Election sa Octobre 30, 2023 sanglit gipangandaman usab nila ang paghatag sa siguridad sa adlaw sa mga kalag ug mga santos sa Nobyembre 1 ug 2.
Matod ni Police Lieutenant Colonel Janette Rafter ang information officer sa CCPO ug kasamtangan nga deputy city director for operation nga ang gi deploy sa election dili na maoy mo duty inig petsa 31 sa Octobre nga maoy pagsugod pag abli sa mga nag unang sementeryo sa dakbayan sa Sugbo.
Pasabot ni Rafter nga dili mahimong epektibo ang usa ka police kung ipa diretso kinig duty paingon na sa kalag-kalag sanglit gikapoy na kini sa pag bantay sa election nga ilang gituohan nga maabtan pa sa kaadlawon.
Nasayran nga adunay 21 ka sam-ang ang dakbayan sa Sugbo apan ang 13 niini naa sa bukirang dapit samtang ang walo naa sa urban area ug lima lang ang gipatutukan nga mga dagkong sementeryo.
Kini mao ang Calamba, Carreta, Pardo, Queen City Garden ug ang Chinese Cemetery nga maoy dugokonon sa mga tawo.
