CEBU CITY-Nakatala na ang City Health Department (CHD) og 764 ka mga kaso sa dengue nga adunay 10 ka kompirmadong patay sukad niadtong Setyembre 16.
Mao kini ang gibutyag ni Dr. Daisy Villa, ang head sa CHD nga karong tuiga mas taas ang kompirmadong kaso sa dengue kon itandi sa samang panahon sa miaging tuig, nga 30 lang ka kaso.
Iyang gibasol ang padayon nga pag-uwan sa kalit nga pagsaka sa mga kaso sa dengue.
Matod ni Villa nga ang CHD nipatuman og mga lakang aron malikayan ang dugang pagsaka sa mga kaso sa dengue, lakip na ang search-and-destroy operations sa mga barangay diin makita ang breeding ground sa lamok nga Aedes Aegypti, ang tigdala sa dengue fever.
Samtang ang ubang mga aspeto sa 4S nga estratehiya sa DOH naglakip sa luwas nga mga lakang sa pagpanalipod sa kaugalingon, seek early consultation, ug pagsuporta sa indoor ug outdoor spraying isip usa ka paagi aron malikayan ang outbreak.
Nanawagan usab si Villa sa mga barangay nga dasigon ang ilang mga konstituwente sa pagpanglimpyo sa ilang palibot isip paagi sa pagtangtang sa posibleng mga breeding ground sa mga lamok nga dengue.
Partikular niyang giawhag ang mga residente nga haw-asan ang mga sudlanan ug uban pang mga butang nga makatipig tubig.
Gimanduan usab niya ang iyang mga personahe sa pagmapa sa mga lugar sa Siyudad nga adunay taas nga insidente sa dengue aron estratehikong matumbok sa CHD ang posibleng mga lugar nga mahimong mapuy-an sa lamok.
Gitumong sa CHD sa pag-ila niini nga mga lugar aron ang mga grupo makapahigayon sa indoor ug outdoor spraying ug mga corner area diin mahitabo ang dengue infection.
